Liveblog
|
27 augustus 2020
Simmerblog: Simmer yn Rotsterhaule, Sint-Jânsgea en Reahel
Omrop Fryslân is de hiele dei yn Rotsterhaule, Sint-Jânsgea en Reahel. Yn dit simmerblog in oersjoch fan alle ferhalen.
Lêst bywurke: 28 augustus 2020, 08:47
tongersdei 27 augustus 2020
18:00
Ein
Hjirmei komme we oan de ein fan dit blog, tank foar it folgjen.
Freed binne we yn Penjum. Oant dan.
Besjoch de teleyzje-útstjoering:
17:20
Kok strânpaviljoen makket sels drûge woarst
Kok Tim Ebbing kaam middenyn de coronatiid by strânpaviljoen te wurkjen. "Dat seagen wy net oankommen. Mar op in camping is altyd wat te dwaan, dat doe haw ik hovenier west. Túch fuorthelje en kantsjestekke op it gersfjild. Dat soart wurk."
Tim makket út leafhawwerij al sûnt in jier of fjirtjin rollades. Dêr is no drûge woarst by kaam. Dy makket er ek sels, nei in geheim resept. Syn drûge woarst is net yn de winkels te keap. Inkeld freonen en kunde kinne de woarst krije. En de woarst fan Tim stiet op de menukaart fan it strânpaviljoen.
Tim Ebbing
16:20
Camping en strânpaviljoen oan de Tsjûkemar
Sawat 55 jier ferlyn begûnen de pake en beppe en de heit en men fan Petra Heida mei strânpaviljoen Tjeukemeer by Reahel. Der is ek in camping by, mei fêste lisplakken.
Petra hie it de ôfrûne simmer sa drok dat se twa kear de saak tichtsmiten hat en lekker it wetter op gien is. No is it wat oersichtliker mei de drokte.
De camping is noch iepen oant oktober. It strânpaviljoen gie oars altyd yn it winterseizoen ticht. Mar no hawwe se besluten om dochs mar it wykein iepen te bliuwen, ek om it minne foarseizoen te kompensearjen.
Petra Heida
15:10
Bouaktiviteit by fuotbalklup De Wite Peal
By fuotbalklup De Wite Peal binne se nije klaaihokken oan it bouwen. De lêste tiid binne der in soad froulike spilers by kaam. De Wite Peal hat 285 spyljende leden. It is in geselllige feriening, seit foarsitter Jan Boender. Ien grutte famylje. As der putsjes binne, stean de frijwilllgers altyd klear
De klaaihokken wurde betelle mei sponsorjild en mei liend jild. Want de rinte is no leech, neffens de foarsitter. De kompetysje begjint aansen wer en it doel is om út te kommen by de easte trije of yn de neikompetysje. Dan is der kâns op promoasje.
Jan Boender
13:40
Breafabryk
By it breafabryk Van Dijk yn Sint-Jânsgea begjinne de earsten al nachts om 2 oere te wurkjen. De baktiid fan brea is mar leafst achttjin oeren. Hurdbakke is der net by, want dan wurdt it te drûch of te swart, seit Henk van Dijk (75) dy't Maaike van der Hoek mei de Omropmikrofoan in rûnlieding jout. Henk is offisjeel gjin baas mear. Syn soan hat it oernaam.
Earstiids wie brea earmeljusiten. No is it mear in lúkseprodukt foar minsken dy't ôffalle wolle. Der sitte in soad fezels yn. Dy fertarre minder goed en dus is it goed foar de terms, neffens Henk van Dijk.
Yn it begjin fan de coronatiid moasten se by Van Dijk efkes hiel hurd wurkje. Brea wie, lykas húskepapier, in produkt dat de winkels út fleach, safolle flecht wie der op 'e koai.
Oft Henk thús ek in soad brea yt? In bakbrogge, ek wol brea mei bak en tsiis neamd, miskien? Van Dijk ken alle farianten wol. Mei bôle kin it ek, laket er.
Henk van Dijk
12:40
Hoe is wenjen yn Rotsterhaule?
Lykas yn in soad oare doarpen is ek yn Rotsterhaule de beskikberens fan wenhuzen in punt. Om derachter te kommen wat de ynwenners wolle hâldt Doarpsbelang Rotsterhaule in enkête. Politisy út de gemeente komme freed del. Se krije dan te hearren wêr't it doarp ferlet fan hat. Alles folbouwe is ek net wat de measte minsken wolle, tinkt Thijs Maat fan Doarpsbelang.
En hoe sit it mei de jeugd? Doe't de corona yn it lân kaam, naam ek de oerlêst troch jongerein ta. Doarpsbelang hat tegearre mei de jeugd bankjes pleatst. No is de oerlêst in stik minder wurden.
Thijs Maat
