Skippersportret: Douwe Azn. Visser

27 jul 2016 - 06:34
  • Paspoart, Douwe Azn. Visser
  • Douwe Azn. Visser

Alve dagen, fjirtjin skûtsjes. Oer trije dagen begjint it SKS skûtsjesilen, trije wike lang stride de ferskate skûtsjeskippers tsjininoar op de Fryske marren. Wa wurdt de opfolger fan De Jouwer? Yn de oanrin nei de earste silerij op 30 july by Grou, lizze wy alle skûtsjeskippers fan dit seizoen in pear fragen foar. Hjoed it skippersportret fan Douwe Azn. Visser.

Doe’t Douwe yn 2005 foar it earst oan it helmhout kaam op skûtsje It Doarp Grou waard hy fuort kampioen yn de SKS. As tarieding sylt hy yn dizze lêste wike foar de SKS alle dagen. Dochs nimt Visser de tiid om in oan oantal fan ús fragen te beäntwurdzjen.

Wat wie dyn earste taak op it skûtsje?
“Myn earste taak wie it fêsthâlden fan in lyntsje om de fokkeloete yn it each oan de efterkant fan de fok te krijen. Ik wie fyftjin en al lang bliid dat ik mei koe, mar it wie in dom putsje.”

Hokker wedstriid is dy it measte bybleaun?
“Dat binne meardere wedstriden, mar de wedstriid dy’t der boppe útstekt is doe’t wy foar de earste kear kampioen waarden mei Grou yn 2005. We striden mei trije skûtsjes op it kampioenskip: Snits, De Lemmer en Grou op in pear punten. By de earste boei lei Snits twadde of tredde en wy op it fiifde of sechde plak. Snits gong in loefduel oan mei Earnewâld en de Súdwesthoeke. Wy lieten him djipfalle en rûnen ûnder alle trije troch. By it folgjende krúsrak pakten wy Boalsert noch. Wy wûnen de wedstriid en it kampioenskip.”

Hoe makkest fan de bemanning in team?
“Us ploech is foar in grut diel al hiel lang itselde en elkenien wit wat hy dwaan moat. Fan ús bemanning farre der in oantal of se wurkje fier fuort. Yn it foarseizoen traine wy dêrom net in soad, mar sile wy wol alle wedstriden. De lêste wike foar it skûtsjesilen sile wy alle dagen. It skûtsjesilen duorret foar ús dêrom eins trije wiken. Mar wy dogge gjin teamsesjes en wurkje ek net mei in mental coach.”

Wat is dyn favorite fakânsjebestimming?
“De Fryske marren yn de simmer, alhoewol’t it skûtsjesilen net echt fakânsje is foar de skipper en syn frou. As der tiid foar is, noch twa wike op fakânsje nei de sinne om echt fakânsje te hâlden. Mar twa wike oan board fan ús seeskip as alles goed rint kin ek as fakânsje fiele.”

Folje oan: as wy kampioen wurde dan...
“soe dat ferrassend wêze. Oan de hân fan it foarseizoen fyn ik Snits, Akkrum, Earnewâld hiel sterk. Mar wy geane flink ús bêst dwaan om it wol te wurden en dan in grut feest yn Grou.”

Sjoch foar alle skippersportretten yn ús dossier en alles oer it skûtsjesilen is te folgjen op de Simmer yn Fryslân-side.

Diel dit berjocht op:
(advertinsje)
(advertinsje)