Skippersportret: Auke de Groot

24 jul 2016 - 12:00

Alve dagen, fjirtjin skûtsjes. Oer seis dagen begjint it SKS skûtsjesilen, trije wike lang stride de ferskate skûtsjeskippers tsjininoar op de Fryske marren. Wa wurdt de opfolger fan De Jouwer? Yn de oanrin nei de earste silerij op 30 july by Grou, lizze wy alle skûtsjeskippers fan dit seizoen in pear fragen foar. It wurd is hjoed oan Auke de Groot.

It skûtsjesilen sit yn it bloed by de famylje de Groot. Pake en heit de Groot wiene al foar him skipper op it skûtsje de Súdwesthoek. Dêrom is it ek net gek dat Auke de Groot al op syn fjirtjinde bemanningslid waard fan datselde skûtsje.

Wat wie dyn earste taak op it skûtsje?
‘’Doe’t ik fjirtjin wie kaam ik by ús heit oan board yn ‘e roef. Dat wiene bysûnder learsume jierren, om’t je dêr alles meikrigen fan wat der op it efterdek barde. Mar ek hokker besluten der naam waarden en wêrom.’’

Hokker wedstriid is dy it measte bybleaun?
‘’In pear jier lyn waarden wy yn Wâldsein wilens in ynhelwedstriid earste. Dat wie de earste kear dat wy earste waarden, salang as ik skipper bin. We sylden de hiele middei op de twadde pleats, efter Wâldsein. Mar yn de lêste rûte waarden wy earste.’’

Hoe makkest fan de bemanning in team?
‘’By de gearstalling en it sykjen nei in nij bemanningslid fyn ik it hiel wichtich dat de bemanningsleden mei-inoar opsjitte kinne. Dêrom wol ik nije bemanningsleden it leafst al wat kinne, om dat goed bepale te kinnen. In goeie sfear is ek hiel wichtich. Alles moat besprekber wêze en alles dat fan belang is moat ek besprutsen wurde. Om eventuele negative ûnderling sa gau as mooglik wei te nimmen.’’

Wat is dyn favorite fakânsjebestimming?
‘’Ik gean it leafste nei in wintersportbestimming. Skye is ien fan myn favorite sporten. Ik haw in hekel oan it strân fanwegen it sân en de waarmte. Wy geane regelmjittich mei freonen, wêrûnder ien fan de skoatenmannen fan it skûtsje, en harren húshâldingen nei Tsjechië, Dútslân of Eastenryk.’’

Folje oan: as wy kampioen wurde dan...
‘’Ik ferwachtsje dat wy dit jier kâns meitsje om regelmjittich by de earste fiif finishe te kinnen. Wy hawwe in goed gefoel oer hoe’t it skip dit foarjier rûn en dat wy ôfrûne winter en it foarjier alles deroan dien hawwe om it better te dwaan dan foarich jier.’’

Sjoch foar alle skippersportretten yn ús dossier en alles oer it skûtsjesilen is te folgjen op de Simmer yn Fryslân-side.

Diel dit berjocht op:
(advertinsje)
(advertinsje)